四小妖台北飄流記 Day 3 - Part 2

30/6/2008 Day 3 Part 2

我地由動物園返到台北車站, 當然~~~我地係唔會放過任何有Mister Donut既地方~!! 嵐嵐仲表現左佢既絕技~20秒內食晒成個Donut!! 可能你地覺得Donut 又唔係咁大, 20秒食晒有幾奇~?! 奇就奇在...20秒之內...有15秒係講緊野....同埋...你知啦Donut 甜耶耶咁...一啖都覺得好"漏"...即係佢用左三啖...5秒既時間食左個Donut......OH MY GOD~~!! 媽呀~我的天咧~!

我地見到Mister Donut 既波堤獅實在太可愛啦, 所以我地拎左佢個傳單留念同影相呀! 你睇下我地變得幾咁可愛~!

返到酒店, 大家小歇一會兒, 沖個靚涼, 又再出去食晚飯啦~~~! 今晚食飯既"怒畸唇"就係鼎鼎大名響晒朵既"黑武士火鍋"啦, 呢間都係勳哥極力推介既食店之一, 所以果然係"信心既標誌~~~". 哈哈~!

其實呢度最出名係麻辣鍋同芋頭排骨鍋(我上星期六同朋友講起先知), 但係魚魚唔食得辣既關係, 同埋我當時又唔知芋頭鍋既出名....所以我地揀左沙茶火鍋~! 不過, 呢個沙茶火鍋都帶黎左一單笑料~! 件事既經過係咁............

侍應遞上一鍋清湯鍋....
魚: 喂~哥哥, 我地唔係叫沙茶火鍋咩....? 點解係清湯咁既~!?
寶: 唔知喎....可能呢度既火鍋係咁既呢....?
華: 撩下個底...啲沙茶會唔會係喺底架~~?
寶: 唔知喎....我第一次黎台灣打邊爐咋...可能係呢度既特色呢...?
魚: 唔係喎!!! 乜都冇既~??! 咁沙乜野茶呀~~? 伙記~!!!!
侍: 是是...
魚: (有啲忟憎..)啲沙茶去左邊呀~~?! 又話係沙茶火鍋既~!? 冇味叫人點食呀?!
侍: 小姐, 不好意思哦, 因為...沙茶火鍋, 要在調味料那邊舀沙茶醬放下去哦~!
魚: (不悅).........
寶: 哦................原來係咁...!!!(哎呀~~好彩唔係我問, 冇咁瘀...哈哈~!!)
魚: (詐嬌)EEEEEEEEeeeeeeeee~~~~!!!!!!!
寶: 好好~~~等我去拎!!

原來台灣人打邊爐都好有分別架~~~除左要自己落沙茶醬之外, 佢地會將你之前點左既丸, 餃子, 菜, 瓜之類既材料..都會一次過放晒落去, 一開波都一齊滾~!

食飽之後, 華哥仔, 魚魚同禎禎返左酒店先, 我同嵐嵐就搵地方蒲.....噢, NO!! 係喎~! 星期一喎~!!! 度度都休息...弊~!!

咁我地唯有去左Funky 睇下囉.....呵呵, 好彩~!!! 仲有開~! 不過weekdays 既Funky 係 K場黎架~!!! 估佢唔到喎~! 有台灣人唱廣東歌, 勁好笑, 當然仲有人唱閩南歌啦, 不過最勁既係見到有個男版既"演崎步"!!!!!!!! 嚇我一跳耶~!

坐左陣就返去啦, 唉.........要執野聽日返香港啦~! 可唔可以再stay 幾日呀....?

我係波堤寶

波堤嵐~!

波堤禎~!

黑武士火鍋

門口就放左兩隻鸚鵡~~~

起爐呀~~~~~~~~~!

瘀左一野既魚魚~~~呵呵~! 乖~~~呵返~!!

啲伙記都走得好快~~~冇影架~!!!

V 爆既嵐嵐~~~佢呢個人唔多食火鍋都竟然話好食~!!!! 勁~!

超愛打邊爐既禎禎~!!!! 叫多啲呀~!!!

華哥已經期待已久架啦~!!! 快啲上鍋啦~!! 佢拆店架啦~!

麻辣小黃瓜, I like it~~~~~~~!!!

哈哈~!! 沙茶醬自己鍾意落幾多, 就放幾多啦~!