Bangkok Day 2 28/08/2009
Part 2
一輪大血拼殺過片甲不留, 屍橫片野之後, 我地就返左酒店沖個涼, 抖一下, 飲啖茶, 就再出發去MASSAGE!!!
呢個Ratchadamri BTS站最近我地酒店, 走出去都唔駛3分鐘~!
我前年曼谷遊記都講過, BTS既票呢, 你可以買張好似八達通既Smart Pass, 如果你真係成日搭. 不過, 我覺得除非你去啲好遠既地方, 例如係翟道翟假日市場, 我就建議你地搭BTS去, 如果好近呢.....有兩人以上都不如搭的士踩meter 可能仲舒服~!
BTS既車廂廣告好靚呀~!
令到成個車站冇咁悶~!
我地搭BTS去到Chong Nonsi 站, 落咗車站行大約5分鐘左右, 就係喺Ascott Hotel 斜對面既呢間MASSAGE - Health Land.
呢度就係我地按摩既地方~!
裝修充滿著歐陸風味, 好舒服咁喎~!!
兩位THAI MASSAGE呀~! 唔該~! 每位450Baht , 按兩個鐘喎~!!! 抵~!
其實呢度, 除咗Thai Massage 之外, 都仲有其他既服務, 好似啲facial 呀, 推油呀, 磨砂呀, 乜都有~~~當然價錢就唔同啦, 800-1600Baht 不等.
按摩MASSAGE 小貼士:
如果你想個師傅大力啲呢, 你同佢講"lang lang"(0靚模個"0靚"音)
如果你想佢細力啲呢, 就講"koi koi"(蓋音).
按完之後, 佢地多數按摩店都會招呼你去換返對鞋同飲茶, 當然都係俾"貼士"個按摩師傅既時候啦~! 咁你就睇下喺咩地方, 如果好似Health Land 呢啲平民少少既, 20Baht都得啦~! (當然, 如果你去Divana/Let's Relax 嗰啲俾多少少噢畸啦~!真係好好招呼架喎~!)
如果你想講多謝呢, 你就同佢講"及本cup", 或者"及本媽cup"(後者係Thank you very much 之意, 記住句句尾音都係升高架喎~~)
按完摩之後, 我地就搭的士去附近既"建興酒家"食晚飯, 無錯即係"SOMBOON"(泰文讀"爽叛"). 呢間"建興"已經有40年歷史啦~! 最最最出名係咖哩炒蟹! 有啲人專登淨係食呢樣咋!
建興酒家 SOMBOON SEAFOOD
呢度都好多外國遊客, 不過其實本地人仲多~!
你地睇下~!!!
冰凍既菊花茶....唔知點解有一陣燕窩味既~!?
好肚餓呀~!!! 有得食未呀?
馬拉盞炒含羞菜<----含羞草個FD?
咖哩炒蟹, 呢隻係中型蟹, 只不過係280Baht, 作死~!!! 抵~!
個汁.......好好送飯呀~~~~~~~~!!! 白飯兩碗, 唔該~!!!!!!
佢最鍾意食既生蝦刺身!!! 好味~!!!!!!!! 好鮮甜~!!!!
仲有個魷魚筒唔記得左影.....哈哈~! 呢餐飯只係 900Baht ! 抵食到癲~!!!! 一定Encore~!
食飽飽, 就好眼訓啦~! 返酒店好鬼快就訓到豬咁~!
第三日見啦~!
No comments:
Post a Comment